FlyArystan тағы бір жаңа бағытты іске қосады

Алматыдан Нүкіске ашылған бағытқа билеттерді сата бастаған FlyArystan іле-шала Өзбекстанның Ферғана аңғарының шығысындағы гүл шаһар Наманганға да билеттерді сатуды бастады. Қала туристердің көз жауын алатын ерекшеліктерімен танымал: мұнда көне құрылыстар мен ескерткіштер, саябақтар мен жүзімдіктер бар. Наманган ежелден бері қолөнершілер қаласы болып саналған. Сондықтан қалада серуендеген саяхатшы керамика мен ыдыс-аяқтар жасайтын көптеген шеберханаларды, түрлі зергерлік бұйымдарды, ерекше кәдесыйларды таба алады.

«Біз Өзбекстанның ең ірі қалаларының бірі Наманганға барып-келуге қолжетімді рейсті ашқанымызға қуаныштымыз. Бұл арқылы тарихы тереңнен тыныстайтын, тілі мен ділі жақын бауырлас Қазақстан мен Өзбекстан халқының байланысы одан әрі берік болатынына сенімдіміз. Екі елдің де мәдени дәстүрі ұқсас, сондықтан бұл өзара түсіністік пен ынтымақтастықты нығайтуға ықпал етері сөзсіз. Айта кетейік, Ферғана өңірі қазақстандықтарды өзінің бай аграрлық секторы мен индустриялық мүмкіндіктерімен қызықтырады. Яғни екі елдің тұрғындарына да сауда және экономикалық байланыстарды дамытуға зор мүмкіндік ашылады», – деді FlyArystan маршруттық желісін жоспарлау және кірістерді басқару жөніндегі директоры Ренат Абулханов.

Қазіргі уақытта әуетасымалдаушы Өзбекстанның екі қаласына рейстерді орындайды: Астанадан Ташкентке және Алматыдан Самарқанға. Осы жазда Алматыдан Нүкіс пен Наманганға рейстерді іске қосу жоспарлануда.